【球王戴帽】阿根廷反勝 世界盃有得睇美斯

作者:Candice 發表日期:2017-10-11 10:02:02

即上英超刨績王:http://win.on.cc/epl 

阿根廷絕處逢生,作客反勝厄瓜多爾,美斯有得踢世界盃喇!今仗賽前藍白兵團僅排第6,今仗基本上非勝不可,好衰唔衰開波四十幾秒就失波,堅大吉利是。好彩美斯挺身救國,9分鐘內梅開二度火速反先,換邊後佢再爆Seed抽入靚波大演帽子戲法,最後阿根廷成功反勝對手3:1,得償所願進軍俄羅斯。

今仗對阿根廷非常重要,但球隊一開波就未夠集中,主隊連拿度伊巴拉殺入禁區,射破羅美路十指關,藍白兵團1分鐘就落後,認真濕滯。但厄瓜多爾因為已經出局,火速開紀錄後班波個心勁雄,頻頻壓上又唔落力迫搶,令客軍王牌美斯勁多空位掂波,咁樣就同自殺冇分別。呢名當世球王,12分鐘於中路策動反擊,分波予左路迪馬利亞,後者妙傳入禁區,美斯快門將一步抽射入網,好快就追成平手。之後阿根廷完全取回主導,20分鐘美斯壓前拍甩對手中堅皮球,禁區內左腳狂抽網頂搞掂,梅開二度下反超前2:1。之後美斯中路妙傳直線入禁區,迪馬利亞後插起右腳射門,但就被對手門將救出,半場阿根廷領先2:1。

換邊後主隊仲未放棄,瘋狂利用速度及簡單打法狂轟對手,令阿根廷後防頗為麻煩。但有美斯就唔使驚,62分鐘佢於中路面對3個敵衞,向左帶橫勁射入網,完成帽子戲法。呢個入球完全淋熄主隊道火,最終阿根廷3:1擊敗對手全取3分,殺入小組前四位置,取得俄羅斯世界盃決賽周入場券,堅可喜可賀!

東網體育同你追實體壇每個精彩時刻! 
http://bit.ly/2ecTF2A 


本文来源:http://hk.on.cc/hk/bkn/cnt/sport/20171011/bkn-20171011092336088-1011_00882_001.html

本文固定鏈接: http://www.adonjewelry.com/29555.html
轉載請注明:Candice 2017-10-11 10:02:02 於 香港最新資訊 發表

上一篇: :下一篇
返回頂部