政Whats噏:鄭鬆泰丟職 戴耀廷陳健民教席危

作者:Joanna 發表日期:2018-01-13 12:23:26

熱血公民立法會議員、理工大學應用社會科學係導師鄭鬆泰前年喺立法會會議廳內,涉嫌將建製派議員枱上的五星旗及區旗倒插,早前被裁定侮辱國旗及區旗兩罪罪成,合共罰款5000港元。雖然鄭鬆泰唔使入獄,但理大就成立紀律委員會跟進事件,今日(12日)理大裁決唔再同佢續約。鄭鬆泰侮辱五星旗及區旗都搞到教席不保,同樣在大學任教嘅違法佔領行動(佔中)發起人戴耀廷及陳健民,亦隨時因為佔中案判決而導致教席不保,唔知兩人會否騰騰震呢?

理大紀律委員會對鄭鬆泰的紀律裁決,指鄭嘅行為及定罪,同大學承諾嘅優質教育、接受國際化嘅方向唔一致,所以喺鄭鬆泰今年6月約滿之後,校方唔會再同佢續約。鄭鬆泰自爆,話收到係主任嘅來電,話佢喺下周一(15日)開新學期時,會被安排做另外嘅工作,本來要教嘅科目冇得教落去,直至約滿為止。咁嘅安排,即係要將鄭鬆泰「雪藏」到約滿後踢佢走。鄭鬆泰就對校方裁決有曬心理準備,但認為解僱理由非常可笑。

另一邊廂,戴耀廷及陳健民分別擔任香港大學法律係副教授及中文大學社會學係副教授,在違法佔中案件未開始審理之前,其實唔少人包括立法會議員何君堯已經多次去信港大,鬧爆戴耀廷鼓吹違法佔中及「違法達義」口號,扭曲下一代對法律槪念嘅理解,要求校方將戴耀廷「炒魷」。大專院校通常會在教職員罪成後才啟動紀律程序跟進,如今鄭鬆泰事件已成為「案例」,相信戴、陳除咗要承擔刑責,教席都隨時不保,睇嚟都要執定包袱喇。

當日有份舉報鄭鬆泰倒插五星旗及區旗嘅立法會議員劉國勳,對理大不與鄭鬆泰續約表示贊同,他認為大學老師應為人師表,以身作則教學生尊重國家。劉國勳話,鄭鬆泰被判罪成,有損學校形象之餘,仲對學生造成不良影響,仲話戴耀廷公然策劃違法佔中,喺一定程度上同鄭鬆泰嘅事件性質相同,甚至更嚴重,社會應該引以為戒、各大專院校應該參考判決,以儆效尤。


本文來源:http://hk.on.cc/hk/bkn/cnt/news/20180112/bkn-20180112222257764-0112_00822_001.html

本文固定鏈接: http://www.adonjewelry.com/68126.html
轉載請注明:Joanna 2018-01-13 12:23:26 於 香港最新資訊 發表

上一篇: :下一篇
返回頂部